Zunubai suna mayar da zuciya daga yanayinta na asali na taqawa zuwa yanayin lalacewa da karkacewa. Tasirin zunubai a cikin zuciya kamar tasirin cututtuka ga jiki yake. Zunubai su ne cututtukan zuciya, kuma babu magani ga zuciya sai barin wadannan zunubai. Duk wanda ya hana kansa bin sha'awarsa, zuciyarsa za ta ji alherin Allah a wannan duniya, kafin ya kai ga makomarsa a Aljanna. Ayar: (Lalle masu imani masu taqawa suna cikin ni'ima, kuma lalle masu zunubi suna cikin wuta mai ci) 1 ba ta takaita ga alherin Lahira da wutar da ke ci kawai ba; tana nufin yanayinsu a cikin gidaje uku: gidan wannan duniya, gidan Barzakh (yanayin rayuwa a tsakanin lokacin mutuwar mutum da Ranar Tashin Alqiyama), da gidan madawwami. Masu biyayya ga Allah za su ji alherinSa, yayin da masu zunubi za su sha azabarSa. Ni'ima ta gaskiya ita ce wadda mutum yake ji a zuciyarsa, kuma azaba ta gaskiya ita ce wadda mai zunubi yake sha a zuciyarsa. Babu azaba mafi muni kamar ta tsoro, damuwa da fargaba, wadanda ke shake zuciya, suna kuma karkatar da ita daga tunawa da Allah ~ da Ranar Lahira. A yanayin Barzakh, mai zunubi zai sha azabar rabuwa, da jin nadama saboda rashin samun alherin Allah. Nadama da fargaba za su sa hankalinsa ya zama ba shi da amfani, har zuwa Ranar da Allah ~ zai mayar da hankali ga jiki, yana umurtar tashinsa. A lokacin ne azaba take komawa wani mataki mafi zafi. Wadanda suka yi biyayya ga Allah ~ a wannan duniya za su sami matuqar farin ciki na kasancewa tare da Shi, suna da natsuwa a zukatansu, cike da soyayya da tunawa da Shi ~. Amma wadanda suka sayar da damarsu mai daraja ta samun nasara da farashi kadan, ya kamata su nemi sanin ainihin darajar kayansu wajen malaman ilimi. Abin mamaki ne cewa kayan da mutum ya mallaka (wato mu'amalolin rayuwa) Allah ya saye shi da farashin Aljanna, tare da Manzon Allah ﷺ a matsayin mai shiga tsakani a wannan ciniki, amma mutum zai iya sayar da rayuwarsa da mafi ƙarancin farashi! Allah ya ce: ({Duk wanda Allah ya wulakanta, babu wanda zai iya girmama shi.})