شریعت، جسے اللہ ﷻ نے نازل کیا اور اس کی وضاحت فرمائی، محض واضح خیالات کی صورت میں نہیں چھوڑی گئی، بلکہ شارع چاہتا تھا کہ وہ ایک ٹھوس حقیقت بنے۔ چنانچہ اُس نے عملی احکام نازل فرمائے جن کا مقصد حقیقت میں اس کے وجود کو محفوظ رکھنا اور وہ سب کچھ روکنا ہے جس سے شریعت منع کرتی ہے، اور اس کا طریقہ ریاست ہے۔ چنانچہ اُس نے شریعت کی حفاظت کے لیے اس کے قیام کا حکم دیا۔ اللہ ﷻ نے حکمران کے لیے احکام مقرر فرمائے؛ اُس نے اسے حکم دیا، منع کیا، اور اسے دین قائم کرنے اور اس کی نگہبانی کرنے کا پابند کیا۔ اُس نے امت کو اس معاملے میں حکمران کی اطاعت کا حکم دیا اور یہ بھی کہ اگر وہ غفلت برتے تو اس سے بازپرس کی جائے۔ اُس نے یہ تقاضا امت سے بطور افراد اور بطور جماعتوں کیا۔ رسول اللہ ﷺ نے فرمایا: "شہیدوں کے سردار حمزہ ہیں، اور وہ شخص جو کسی ظالم حکمران کے سامنے کھڑا ہوا، اسے (نیکی کا) حکم دیا اور (بدی سے) روکا، اور پھر قتل کر دیا گیا۔" [اسے حاکم نے روایت کیا]۔ آپ ﷺ نے فرمایا: "سب سے افضل جہاد ظالم حکمران کے سامنے حق بات کہنا ہے۔" [اسے ابن ماجہ اور نسائی نے روایت کیا]۔ آپ ﷺ نے یہ بھی فرمایا: "ہاں، اللہ کی قسم! تم پر لازم ہے کہ نیکی کا حکم دو اور برائی سے روکو، اور ظالم کا ہاتھ پکڑو، اسے حق پر مجبور کرو اور حق کا پابند بناؤ۔" [اسے ابوداؤد اور ترمذی نے روایت کیا]۔ ظالم حکمران کو حق پر مجبور کرنا اور اسے اس کا پابند بنانا کوئی نہیں کر سکتا سوائے اُن کے جو قوت اور طاقت رکھتے ہوں، یعنی کوئی جماعت یا گروہ، کیونکہ افراد ایسا کرنے کی استطاعت نہیں رکھتے۔