"Al-hilf" katika lugha ni agano na urafiki. Husemwa "halifuhu" kutokana na "'ahiduhu" (alifanya agano naye). Isipokuwa neno "al-hilf" hutumika kwa sababu ya maana yake ya kitaalamu kama inavyotumika hasa kwa muungano wa kijeshi. Miungano ya kijeshi ni makubaliano yanayofanywa kati ya Mataifa mawili au zaidi ambayo huyafanya majeshi yao kupigana pamoja dhidi ya adui mmoja wa pamoja, au kufanya taarifa za kijeshi au zana za vita ziwe za kubadilishana kati yao, au kama mmoja wao ataingia vitani watashauriana ili waingie vitani pamoja au la kulingana na maslahi wanayoyaona. Miungano hii inaweza kuwa mikataba ya pande mbili iliyofungwa kati ya Mataifa mawili, matatu au zaidi, lakini hawazingatii uchokozi dhidi ya mojawapo ya Mataifa hayo kuwa uchokozi dhidi yao wote; badala yake, ikitokea uchokozi dhidi ya mojawapo ya Mataifa yaliyoingia mkataba, Taifa lililoshambuliwa, Mataifa ambayo yana muungano wa kijeshi nalo, na kwa kuzingatia maslahi yao, watatangaza vita pamoja na Taifa lililoshambuliwa dhidi ya Taifa mchokozi, au la. Na miungano hii inaweza kuwa miungano ya pamoja ambapo uchokozi dhidi ya mojawapo ya Mataifa yaliyoingia mkataba unachukuliwa kuwa uchokozi dhidi yao wote, hivyo kama vita itatokea kati ya mmoja wao na Taifa lolote, basi Mataifa mengine yote yaliyoingia mkataba yataingia katika hali ya vita dhidi ya Taifa hilo. Miungano yote hii, iwe ya pande mbili, ya pamoja au nyingine yoyote, inalazimu jeshi lipigane pamoja na mshirika wake ili kulinda taifa hilo na utambulisho wake, iwe kuna viongozi wengi au kiongozi mmoja.