اسلامی لشکر کی تیاری بیت المال سے ہوتی ہے، کیونکہ بیت المال کا مال مسلمانوں کے مفادات کے لیے خرچ کیا جاتا ہے۔ پس جن چیزوں کے لیے اسے خرچ کیا جاتا ہے، ان میں سے ایک جنگجوؤں کی تیاری ہے۔ اس لیے لازم ہے کہ جنگجوؤں کو خلیفہ کی قیادت میں ایک ہی اسلامی لشکر میں منظم کیا جائے، خواہ لشکر کی تقسیمیں کتنی ہی زیادہ ہوں اور اس کی تنظیم کے فوجی پہلو کتنے ہی متنوع ہوں۔ ان سب کو ایک ہی جھنڈے کے نیچ ہونا چاہیے، خواہ اس کے علم کتنے ہی زیادہ ہوں۔ پورے لشکر کی تیاری بیت المال ہی سے ہوگی، کسی اور جگہ سے نہیں۔ اگر کوئی شخص جنگجوؤں میں سے کسی کی تیاری کرنا چاہے، باوجود اس کے کہ بیت المال موجود ہے، تو یہ رقم بیت المال میں جمع کرائی جائے گی۔ لشکر کی چھوٹی یا بڑی ہر چیز کی تیاری اسی سے کی جائے گی۔ اگر بیت المال میں مال نہ ہو اور مسلمانوں کے دفاع کے لیے لشکر کی تیاری فوری ضرورت بن جائے تو خلیفہ پر لازم ہے کہ مطلوبہ رقم فراہم کرنے کا بندوبست کرے، کیونکہ یہ وہ فریضہ ہے جو تمام مسلمانوں پر عائد ہوتا ہے۔ اگر بیت المال میں بیت المال کی مستقل آمدنی سے مال موجود ہو تو اسی سے یہ خرچ کیا جائے گا۔ اگر ایسا نہ ہو تو اس کی ذمہ داری مسلمانوں پر آئے گی، چنانچہ خلیفہ امت سے مال لے کر لشکر اور اس کی تیاری کے اخراجات پورے کرے گا۔ لشکر کی تیاری میں جو خرچ ہوگا وہ اللہ (سبحانہ وتعالیٰ) کی راہ میں خرچ کیے گئے مال میں شامل ہے، خواہ لشکر جنگ کی حالت میں ہو یا نہ ہو، کیونکہ جہاد قیامت تک جاری ہے اور لڑائی کے لیے ضروری ہر چیز کے ساتھ لشکر کی تیاری بھی قیامت تک جاری رہتی ہے۔