صحابہ کرام (رضی اللہ عنہم) عرب تھے اور عربی زبان ان کی فطرت کا حصہ تھی، اور وہ عربی زبان کے بارے میں ایک دقیق اور جامع فہم رکھنے والے عالم تھے۔ وہ رسول اللہ ﷺ کے ساتھ ہوتے تھے جبکہ قرآن کا نزول ہو رہا ہوتا تھا۔ رسول اللہ ﷺ واقعات میں اللہ سبحانہ و تعالیٰ کے حکم کی وضاحت فرماتے تھے تاکہ وہ اسے اپنی آنکھوں اور کانوں سے خود دیکھ اور سن سکیں، یہی وجہ ہے کہ وہ شریعت کے بھی عالم تھے اور اس کا جامع فہم بھی رکھتے تھے۔ جب ان کے سامنے کوئی ایسا واقعہ پیش آتا جس میں اللہ سبحانہ و تعالیٰ کے حکم کی وضاحت کی ضرورت ہوتی، تو وہ متن کے فہم سے اخذ کردہ اپنی رائے (معقول النص) کی وضاحت کے ذریعے اس کا شرعی حکم بیان کر دیتے تھے۔ اکثر وہ دلیل کی وضاحت کیے بغیر صرف حکم تک محدود رہتے تھے، چنانچہ صحابہ کا فیصلہ ان کی رائے کی صورت میں منتقل ہوا۔ یہی وہ وجہ ہے جس سے بعض لوگوں نے یہ سمجھ لیا کہ صحابہ کرام (رضی اللہ عنہم) فیصلوں میں اپنی (ذاتی) رائے دیتے تھے۔ حقیقت یہ ہے کہ صحابہ کرام (رضی اللہ عنہم) وہ شرعی حکم بیان کرتے تھے جو انہوں نے شریعت کے نصوص کے فہم سے اخذ کیا ہوتا تھا، لیکن وہ اس کے ساتھ دلیل نہیں لگاتے تھے اور نہ ہی حکم کی تشریعی وجہ یا اس تشریعی وجہ کی دلیل کی وضاحت کرتے تھے۔